Kulankii Caawa ee Xisbiyada Mucaaridka ah iyo Daahir Riyaale iyo tabcooyinka ku lifaaqan kulankaa.

Somalilandcenter.com - Hoggaanka labada xisbi ee mucaaridka UCID iyo KULMIYE ayaa caawa fiidkii soo gebagebeeyey wadahadal fool-ka-fool ah oo ay ku yeesheen galabta Qasriga Madaxtooyada, kadib martiqaad qado iyo fadhi ah oo uu Madaxweyne maanta ugu sameeyey halkaas.

Kulankan oo ay ka qaybgaleen dhinaca mucaaridka, min saddex xubnood oo ay hoggaaminayeen Guddoomiyayaasha labada xisbi ee UCID iyo KULMIYE, Axmed Maxamed Siilaanyo iyo Faysal Cali Waraabe, waxa uu dhammaaday caawa fiidkii, wax war ah oo rasmi ahina kama soo bixin.

Hase yeeshee, waxa la sheegay in labada dhinac ay si adag uga wada hadleen arrimaha khilaafku ka taagan yahay iyo guud ahaan xaaladda dalka, balse, aanay jirin wax la isla meeldhigay. Waxaana la sheegay in kulan kale loo ballamay Isniinta oo taariikhdu tahay 19 May.

Madaxda xisbiyada mucaaridka ah oo ay saxaafaddu la xidhiidhay way diideen inay wax war ah bixiyaan, waxayna sheegeen keliya in kulankaasi ku dhacay jawi wanaagsan, loona ballamay kulan kale 19 May.

Fadhigan maanta oo aanay jirin cid dhexdhexaadinaysey waxa uu ka dambeeyey kulan xalay Madaxtooyada ku dhexmaray Madaxweyne Riyaale iyo madaxda labada xisbi ee mucaaridka ah, kaas oo gogol-xaadh u ahaa kulankan maanta, isla markaana la iskula qaatay in la joojiyo dacaayadaha iyo eedaymaha saxaafadda la isu marinayo iyo in la dejiyo xaaladda, wadahadalna la bilaabo.

Kulamadaasina waxay ka dambeeyeen xidhiidh wasiirka Maaliyadda, Xuseen Cali Ducaale (Cawil) uu shalay la sameeyey xisbiga mucaaridka ugu weyn ee KULMIYE oo isaga oo ah ergey ka socda Madaxweyne Riyaale ka dalbaday xisbiga KULMIYE in ay la kulmaan Madaxweyne Riyaale si xaaladda looga wadahadlo.

 Tabcooyinka. 

Sharcinimada madaxweynaha oo dhammaanaysa May 15, 2008 saacadu marka ay tahay 12:00:00 AM ( ee habeen-badhka), haddaba haddii aydhaafto saacad, maalin, bil, ama sanad waa isku mid jabinta sharciga.

Haddii aan is barbardhigno labada dhinac ee is haya muxaafid iyo mucaarid.

Muxaafid: Madaxweynaha iyo xukuumadiisu waxa uu  wadahadalku dhankooda ka yahay in ay mudada May 15, 2008 ku dhaafaan oo aan dadweynaha iyo xisbiyada mucaaridku aanay ku gadoodin, waxay ku tala jiraan in ay u harag jiidaan, dajiyaana dadweynaha, jabinta sharcigana ay la wadaagaan xisbiyada mucaaridku oo loo yidhaa heshiish iyo is afgarad ayaa labada dhanba wada gaadheen, dhanka sharcigana ay tahay mid isku mid ah, oo haddii aan ka hor muddada go’aan la wada gaadhin uu jabayo sharciga uu ku fadhiyo madaxweynuhu, taasi oo xukuumadu rabto in lala wadaago burburinta sharciga, kuna dajiso xaalada kacsan ee dalka, muddo dabadeedna ay sidii ay xukuumadu rabtay u socoto.

Mucaarid:  Mucaaridku waxay aaminsan yihiin in ayna noqon kuwii u horseeda fowdo ama qas dalka ku dhaca, iyada oo dadweynaha lagu qufulay in ay nabada ilaaliyaan, oo si qaldan wax loogu sheegay dadweynaha, maadaama dadweynuhu aanay fahan badan oo dhanka sharcinimada ah aanay lahay ay ka cabsi qabaan qalalaase dalka ku dhaca.

Su’aalaha dadweynuhu isweydiinayaan.

Xitaa haddii ay xisbiyada mucaaridku ogolaadaan muddada sanadka ah ee guurtidu kordhiyeen, ayaa damaanad qaadaya in aanay xukuumaddu muddo kordhin kale samaynay? Maxaase la yeelayaa haddii xukuumada badheedhay ay sii damacdo in ay xukunka sidaa ku haysato oo ay balamahaa la galay ka baxdo sidii caadada u ahayd xukuumada Riyaale?